Um félagið
Skátafélagið Vífill starfar í Garðabæ. Félagið er hluti af Bandalagi íslenskra skáta og starfar í anda skátastarfs.
Saga Vífils
Skátafélagið Vífill var stofnað á sumardaginn fyrsta árið 1967, en þá þótti tími kominn til að að færa starfið alfarið inn í ört vaxandi bæjarfélag Garðahrepp, eins og bærinn hét þá. En stofnun félagsins var í raun, rökrétt framhald, af starfi skátasveitanna sem starfað höfðu innan Skátafélagsins Hraunbúa í Hafnarfirði.
Félagið starfaði fyrst í Flataskóla, og því næst í Goðatúni 3 í húsi sem í dag hefur verið jafnað við jörðu. Tímamót urðu árið 1969, þegar félagið festi kaup á húsinu við Hraunhóla 12.
Viðbygging var reist við húsið árið 1991 og reyndist húsið í alla staði frábærlega og hýsti alla félagsstarfsemi Vífils fram til ársins 2003, þá flutti starfsemin yfir í bráðabirgða húsnæði við Kirkjulund.
Skátafélagið Vífill, Hjálparsveit skáta í Garðabæ og yfirvöld Garðabæjar tókum saman höndum og reistu nýja skátamiðstöð við Bæjarbraut árið 2005. Jötunheimar hafa verið lyftistöng fyrir skátastarf sem og hjálparsveitarstarf.
![](https://vifill.is/wp-content/uploads/2019/12/DSC04378-1024x768.jpg)
![](https://vifill.is/wp-content/uploads/2019/12/jotunheimar.png)
![](https://vifill.is/wp-content/uploads/2019/12/Vifils-grill-1-1024x768.jpg)
Skátafundir, varðeldar, skátamót, útilegur og dagsferðir eru dæmigerð viðfangsefni skátanna í Vífli. Á skátafundum fer fram undirbúningur fyrir hin stærri verkefni, svo sem dagsferðir og útilegur. Í ýmsum ferðum og á skátamótum gefst skátunum svo tækifæri til að reyna á þekkinguna sem þeir hafa innbyrgt á skátafundunum. Ljóst er að útilífið er einn mikilvægasti þáttur skátastarfsins og í krefjandi fjallaferðum sem stundum hafa verið farnar með aðstoð Hjálparsveitarinnar hefur margur athafnasamur unglingurinn náð réttum áttum.
Ferðir á skátamót eru gjarnan á dagskrá.
Skátafélagið Vífill hefur verið svo lánsamt að eiga eigin útileguskála í nágrenni við bæinn og hafa skálaútilegurnar verið einn af hornsteinum skátstarfsins í Garðabæ.
Auk skátafunda, útilífs og skátamóta eru ýmsir aðrir fastir liðir á dagskrá Skátafélagsins á hverju ári eins og hin sívinsælu Ævintýra- og útilífsnámskeið sem Vífill hefur verið með síðastliðin sumur.
Ekki má svo gleyma smíðavellinum, þátttöku í sumarhátíðum skóla, sumardeginum fyrsta, skeytasölu, svo nokkuð sé nefnt.
Við skátar í Garðabæ erum stoltir af því að vera hlekkur í keðju öflugs æskulýðsstarfs sem byggir hugmyndir sínar jafnt á hugmyndinni um virka þátttöku, því í skátaflokknum er hver einasti skáti mikilvægur hlekkur í starfi flokksins og félagsins.
Nú eftir að hafa verið fyrsta skátafélagið sem hefur fengið viðurkenninguna ”Fyrirmyndarfélag Bandalags íslenskra skáta” erum við auðvitað enn stoltari !
![](https://vifill.is/wp-content/uploads/2019/12/Jotunheimar-1-1024x768.jpg)
Jötunheimar
Bæjarbraut 7
210 Garðabæ
Jötunheimar voru opnaðir við hátíðlega athöfn árið 2005. Húsið er að hálfu í eigu Vífils og að hálfu í eigu Hjálpasveitar Skáta í Garðabæ (HSG). Félögin skipa húsnefnd sem að sér um sameiginlegar ákvarðanir er varða húsið.
Heimilið er 1000 fermetrar á tveimur hæðum. Á fyrstu hæð er félagsaðstaða Vífils þar sem hver sveit á sitt sveitarherbergi.
Á annari hæð er hátíðarsalur sem hefur verið leigður út undir veislur.